༢༠༠༧ ལོའི་བོད་ལྗོངས་བོད་ལུགས་གསོ་རིག་སློབ་ཆེན་གྱི་ཞིབ་འཇུག་སློབ་མ་བསྡུ་བའི་བསྐྱར་རྒྱུགས་རྒྱུགས་ཤོག
དང་པོ། དྲིས་ལན་གདམ་འཇུག་བྱེད་རྒྱུ།
གཤམ་གསལ་དྲི་ལན་ཁག་ལས་ཡང་དག་པའི་ལན་གཅིག་གདམ་ཏེ་དེ་མཚོན་བྱེད་ཀྱི་ ( ཀ ཁ ག ང ) གངཡིན་གུག་རྟགས་ནང་འགོད་རྒྱུ།
༡ མིག་གི་ལིང་ཐོག་ལ་ཆེས་ཕན་པའི་ཚྭ་བསྲེག་གི་ཐལ་བ་ནི་ཡིན། （ ）
ཀ རྒྱ་ཚྭ། ཁ རྒྱམ་ཚྭ། ག ལན་ཚྭ། ང ཁ་རུ་ཚྭ།
༢ ཨ་རུ་ར་དང་བ་རུ་གཉིས་སྨན་དུ་གཏོང་སྐབས་རུས་པ་གཏན་ནས་གཏོང་མི་རུང་བའི་ནད་ནི་（ ） ཡིན།
ཀ ཁྲག་ནད། ཁ དམུ་ཆུ། ག དུག་ནད། ང བྱིས་པའི་ནད།
༣ སྨུག་པོ་གྲང་རྐྱེན་གྱི་རྗེས་གཅོད་ལ་ཟབ་པའི་གཉེན་པོའི་སྨན་ནི་ ཡིན། （ ）
ཀ རིལ་ནག་ཆེན་མོ། ཁ བཙོ་བཀྲུ་ཟླ་ཤེལ། ག མང་སྦྱོར། ང དབང་རིལ་ཉེར་ལྔ།
༤ སྔོ་སྦྱོར་གྱི་དུག་ལ་གཅེས་པར་གདམས་པའི་གཉེན་པོ་ནི་（ ）
ཀ འོམ་བུ། ཁ ལུག་མིག ག ལྡུམ་བུ་རེ་རལ། ང ལྕུམ་རྩ།
༥ རྒྱུད་ཀྱི་རྩ་བར་ཁོང་ནད་གཅོང་ལ་རྣམ་པ་གཉིས་ཡིན་ཏེ། ཞེས་པའི་རྣམ་པ་གཉིས་པོ་ནི་（ ） ཡིན།
ཀ གཅོང་ནད་གསར་རྙིངས་གཉིས། ཁ རྒྱུ་མ་ཞུ་བ་དང་། འབྲས་བུ་གཅོང་ནད་གཉིས།
ག དྭངས་མ་མ་ཞུ་བ་དང་སྙིགས་མ་མ་ཞུ་བ། ང མ་ཞུ་སྟོབས་ཆུང་དང་སྟོབས་ཆེན།
༦ སྐྱ་རྦབ་ཀྱི་ནད་ལ་གཤམ་གསལ་ནད་གཞི་དག་ལས་གཙོ་བོར་བཟུང་དགོས་པ་ནི་（ ） ཡིན།
ཀ རླུང་། ཁ མཁྲིས་པ། ག བད་ཀན། ང ཁྲག
༧ གཤམ་གསལ་ཚ་བའི་ནད་ལས་གཏར་སྔས་དྲགས་ན་ཟུངས་ཁྲག་ཤོར་ཞིང་རླུང་ནད་སྐྱེ་བའི་ཚ་བའི་ནད་ནི་ （ ）ཡིན།
ཀ མ་སྨིན་ཚ་བ། ཁ རིམས་ཀྱི་ཚ་བ། ག འཁྲུགས་ཚད། ང གཉན་ཚད།
༨ མོ་ནད་ཁྲག་ཚབས་ཀྱིས་མཁལ་རྐེད་ཆེར་ན་བ་ལ་བསྔགས་པའི་གཉེན་པོའི་སྨན་ནི་（ ）
ཀ སྨྱུག་རྩི་༢༥ ཁ འོལ་སེ་༢༥ ག གུར་གུམ་༡༣ ང གཉེན་པོ་༡༨
༩ རྒྱས་ཚད་ཀྱི་ནད་ལ་གཉེན་པོ་ཆུ་བཞི་ཡིས་ནང་ནས་མཆོག་ཏུ་གྱུར་པ་ནི་（ ）ཡིན།
ཀ སྤྱོད་ལམ་གྱི་ཆུ། ཁ ཟས་ཀྱི་ཆུ། ག སྨན་གྱི་ཆུ། ང དཔྱད་ཀྱི་ཆུ།
༡༠ ཉེས་པ་དངོས་སུ་སྟོན་པའི་བརྟག་པ་ལ་ངེས་དགོས་པའི་རྩ་དོན་གསུམ་ནི་ ( ) ཡིན།
ཀ སློང་བ་རྒྱུ་དང་། མཚན་ཉིད་རྟགས། ཕན་གནོད་བསྟེན་པ་བཅས་གསུམ།
ཁ བལྟ། རེག དྲི་བ་གསུམ།
ག ཉེས་པ་དངོས་སྟོན། ངན་གཡོ་སྐྱོན་བརྟག སྤང་བླང་མུ་བཞི་གསུམ།
ང རྒྱུ། གནས། མཚན་ཉིད་གསུམ།
༡༡ རྩ་ལ་བརྟག་སྟེ་ནད་ཚུལ་བཞིན་རྟོགས་པར་བྱེད་པའི་གནད་འགག་གཙོ་བོ་ ( ) དེ་ཡིན།
ཀ ནམ་དུས་སོ་སོར་རྩའི་འཕར་ཚུལ་འགྱུར་བ་འགྲོ་ཚུལ་ཤེས་དགོས་པ།
ཁ རྟེན་གྱི་རྩ་རྒྱུད་གང་ཡིན་ཤེས་དགོས་པ།
ག ཚ་གྲང་གི་རྩའི་འཕར་ཚུལ་ཤེས་དགོས་པ།
ང ནད་མེད་ཐ་མལ་གྱི་རྩའི་འཕར་ཚུལ་ཤེས་དགོས་པ།
༡༢ གཏར་ཁའི་སྐབས་ཁྲག་དབྱུང་ཚད་ཚོད་འཛིན་བྱེད་ཐབས་ཀྱི་གནད་གཙོ་བོ་ནི་ ( ) དེ་ཡིན།
ཀ ཁྲག་བཟང་ངན་ལ་བརྟག་པ་བྱེད་རྒྱུ། ཁ ཟུངས་བཟང་ངན་ལ་བརྟག་པ་བྱེད་རྒྱུ།
ག རང་བཞིན་ལ་བརྟག་པ་བྱེད་རྒྱུ། ང ནད་སྟོབས་ཀྱི་ཁྱད་ཆོས་ལ་བརྟག་པ་བྱེད་རྒྱུ།
༡༣ ཕྱི་སྐྲན་ལ་ནད་ལ་མེ་བཙའ་འཇོག་པའི་བྱ་ཐབས་ནི་（ ）ཡིན།
ཀ སྐྲན་གྱི་སྟེང་ལ་འཇོག་དགོས་པ།
ཁ སྐྲན་གྱི་མཐའ་ལ་རྒྱབ་དགོས་པ།
ག སྐྲན་གྱི་མཐའ་ནས་རིམ་བཞིན་ཇེ་ཉེར་གཏོང་དགོས་པ།
ང སྐྲན་གྱི་སྟེང་ནས་མཐའ་རུ་ཇེ་འགྱངས་གཏོང་དགོས་པ།
༡༤ མཆེར་ནད་ཚ་གྲང་གང་ཡིན་ཀྱང་དམིགས་བསལ་མངོན་པའི་རྟགས་ནི་（ ） ཡིན།
ཀ སྦོ་རྒྱངས་བྱེད་པ་དེ། ཁ རྩིབ་ཐུང་གཟེར་བ་དེ། ག ལུས་སྐྲངས་ཡོང་བ་དེ། ང ཤ་མདོག་སྔོ་སེར་འགྱུར་འགྲོ་བ་དེ།
༡༥ སྤྱིར་ཚ་བའི་ནད་ཀྱི་རྒྱུ་རྩད་ནས་གཅོད་པའི་ཐབས་ནི་（ ） ཡིན།
ཀ བཤལ་གཏོང་རྒྱུ་དེ། ཁ གྲང་ཐུར་རྒྱབ་རྒྱུ་དེ། ག རྔུལ་དབྱུང་རྒྱུ། ང བསིལ་དུགས་བྱེད་རྒྱུ་དེ།
གཉིས་པ། དྲིས་ལན་གདབ་རྒྱུ།
དང་པོ། དྲི་ལན་མདོར་བསྡུས་གདབ་རྒྱུ།
༡ སྨུག་པོ་རྡོལ་ནས་ཁྲག་ལམ་ཆོད་པ་དང་མ་ཆོད་པའི་གོ་དོན་ཇི་ལྟར་ཡིན་ནམ།
༢ ཚ་སྐྲན་དང་གྲང་སྐྲན་གཉིས་དུས་སུ་བཅོས་མ་ཐུབ་ན་བླ་གཉན་གྱི་ནད་གང་དང་གང་དུ་འགྱུར་རམ།
༣ དྭངས་མ་མ་ཞུ་བའི་གྱུར་དུག་ཞེས་པ་དེ་ཇི་ལྟར་ཡིན་ནམ།
༤ རླུང་གི་རི་ཐང་མཚམས་ཡིན་མིན་གྱི་ཐེ་ཚོམ་དུ་གྱུར་ན་གསང་བ་ཕུགས་འཚོལ་སྨན་གྱིས་བརྟག་པ་ལས་རྟགས་གང་དང་གང་ཚང་ན་རླུང་གི་རི་ཐང་མཚམས་ཡིན་པར་ངེས་སམ
༥ ནད་གཞིའི་ངོ་བོ་གྲང་བ་ཡིན་ཡང་ཕྱི་རྟགས་ཚ་བར་འཁྲུལ་བའི་ནད་གཞི་གང་དང་གང་ཡོད་དམ།
༦ རེག་པ་རྩ་ལ་བརྟག་པའི་སྐབས་མང་འཕར་ཚ་བ་ཉུང་འཕར་གྲང་བ་ཡིན་ཞེས་པ་དེ་མཐའ་གཅིག་ཏུ་ངེས་སམ། ཚུལ་ཇི་ལྟར།
གཉིས་པ། དྲི་ལན་རྒྱས་བཤད་རྒྱབ་རྒྱུ།
༡ ཟུངས་ངན་རླུང་ནད་ཅན་ལ་སྣུམ་འཆོས་བསྟེན་ཐབས་ཇི་ལྟར་ཡིན་ནམ།
༢ རིམས་ནད་མཁྲིས་པར་བབས་པའི་རྩར་རྒྱུག་དང་། རང་བཞིན་ཟས་སྤྱོད་རྐྱེན་གྱིས་མཁྲིས་པ་འཕེལ་བའི་རྩར་རྒྱུག་གཉིས་ལ་་་ཁྱད་པར་གང་ཡོད་དམ།
༣ རྩ་དཀར་གྱི་ལེའུར། གང་ཞིག་རྩ་དཀར་ནད་ཚུལ་མི་ཤེས་པར། གཟའ་ཕོག་ཟེར་བའི་སྨན་པ་བླུན་པོ་སྟེ། ཐབས་འདི་རྨ་རྣམས་ཀུན་གྱི་ལོག་གནོན་དང་། རིམས་དུག་བླ་གཉན་ནད་ཀྱི་མདེ་ཁ་ཡིན། ཞེས་གསུངས་དགོས་དོན་གང་ཡིན་ནམ
༤ དམུ་ཆུའི་ནད་བཅོས་ཐབས་སྐབས་ཚ་ཆུ་གྲང་ཆུར་བསྒྱུར་བ་ལ་གཉེན་པོ་གཙོ་བོ་གང་དང་གང་བསྟེན་དགོས་པ་དང་། གྲང་ཆུར་གྱུར་ཟིན་པའི་རྟགས་དང་དེ་ལྟར་བསྒྱུར་ནུས་པའི་རྒྱུ་མཚན་གང་ཡིན་གསལ་འགྲེལ་བྱ་རྒྱུ།
༥ རྩ་བརྟག་པའི་སྐབས་ཁྱད་ཆོས་དྲུག་ལྡན་གྱི་དུས་སུ་བརྟག་དགོས་པས་དེ་ལྟར་བརྟག་པ་ལ་དགོས་པ་ཁྱད་པར་ཅན་གང་དང་གང་ཡོད་དམ
གསུམ་པ། ལག་ལེན་བཀོལ་སྤྱོད་སྐོར་གྱི་དྲི་གཞི།
༡ ཀོ་བྱི་ལ་སྨན་དུ་སྦྱོར་སྐབས་ལག་ལེན་གྱི་ཆོ་ག་མི་འདྲ་བ་གང་ཡོད་པ་རྣམས་གསལ་བཤད་བྱེད་རྒྱུ།
༢ འབམ་ནད་ལ་སྨན་དཀར་རམ་ལབ་བཅོས་བྱ་བའི་ལག་ལེན་དང་བསྟེན་ཐབས་རྣམས་འགོད་རྒྱུ། ༣ ནད་ཐོག་དངོས་ནང་རྨ་མེད་རུས་ཆག་ལ་གཉེན་པོའི་སྨན་གང་དང་གང་བསྟེན་དགོས་པ་ཡིན་ནམ། གཉེན་པོ་དེ་ལྟར་བསྟེན་པ་ལ་རྒྱུ་མཚན་གང་དང་གང་ཡོད་པ་ཡིན་ནམ
༤ གློ་གཅོང་ཆེན་མོ་སོགས་གཅོང་ཆེན་ཟད་བྱེད་ནད་ལ་སྨན་བཅོས་བྱེད་པའི་བརྒྱུད་རིམ་ནང་གསོ་ཚུལ་གྱི་རྩ་དོན་གང་དང་གང་འཛིན་དགོས་པ་ཡིན་ནམ
༥ རྟ་ཟི་དམར་པོ་ཞེས་པའི་སྨན་དེ་མཁས་པ་སུས་མཛད་པ་དང་། དེ་ནད་གཞི་གང་དང་གང་གི་གཉེན་པོ་ཡིན་པ་བཀོད་དང།
༦ སྟར་བྱང་གི་སྦྱོར་ཚད་དང་ཕན་ཡོན་གང་ཡིན་པ་བཀོད་དང་།
གསུམ་པ། ནད་གཞི་ངོས་འཛིན་བྱེད་རྒྱུ།
༡ གསོ་བྱ་ནད་པ་གང་ཞིག་རྒྱུན་དུ་སྒྱིད་ལུག་ཅིང་གཉིད་ལ་དགའ་བ་དང་། ཁ་ལྕེ་སྐམ་ཞིང་སྐོམ་དད་ཆེ་བ། ལུས་རྔུལ་མང་ཞིང་ཡན་ལག་གི་མཐིལ་བཞི་ཚ་། ཁ་ཟས་འཇུ་ཡང་ལུས་སྟོབས་རིམ་གྱིས་ཉམས་འགྲོ་བ། རྩ་རྒྱུད་གྲིམས་ཤས་ཆེ་ལ་དྲི་ཆུ་རྙོགས་ཤིང་གྲངས་མང་བ་སོགས་ཀྱི་ནད་རྟགས་ལ་གཞིགས་ན་ནད་གཞིའི་ངོ་བོ་གང་ཡིན་པ་དང་། དེར་གསོ་ཚུལ་ལམ་བཅོས་ཐབས་ཀྱི་རྩ་དོན་གང་ཞིག་འཛིན་གོས་། བྱེ་བྲག་གཉེན་པོ་གང་དང་གང་བསྟེན་དགོས་པ་བཅས་གཏན་འཁེལ་གསལ་བཤད་བྱེད་རྒྱུ།
གོང་སྨན་པས། གཅིན་སྙིའི་ནད་རིགས་མཐའ་དག་དང་། ཁྱད་པར་ཟ་ཁུ་ཞེས་བྱ་བ། ལུས་ཟུངས་འཛག་ཅིང་ཆུ་ཁ་སྙི། ཤ་སྐམ་རྔུལ་ཁ་སྙི་བ་དང་། གཅིན་ལ་སྦྲང་མ་འདུ་བ་འབྱུང་། ཞེས་དང་། གཅིན་སྙི་ཟ་ཁུའི་གཉེན་པོའི་སྨན། ཨ་རུ་བཅུ་སྟེང་དོམ་མཁྲིས་དང་། གི་ཝམ་གསེར་བྱེ་བ་ཤ་ཀ། གཟེ་མ་སྐྱུ་རུ་ཡུང་སྐྱེར་རྣམས། བསྣན་པ་བསྐོལ་གྲང་ཆུ་ཡིས་འཕུལ། ཕན་ཡོན་མཁལ་ནུས་གསོ་བ་དང་། ཆུ་ཁ་སྲ་ཞིང་ཟུངས་འཛག་སྡོམ། གཞན་ལ་མེད་པའི་གཅེས་ནོར་ཡིན། ཞེས་སོ། །
